Nich wiet van de Kreisstrauten no Hunteburg, do wuornen de Hüerslüüt Stienmeggers. Se hadden eene Koh, un Pappen was manges no Handlanger bien Mürkermester Steinemann.
Nu seiden de Beeden aubends inne Küerken. Stienmeggers Anna was oll 'ne tietlang an steunen.
"Mammen wat hässe", frogde Matzken siene Frubben.
"O Pappen", segg et, "ick häwwe so Piene inne linke Bost."
"Oh", segg Matzken, "do is nich met to spaßen, man hört vandage so vierl van Krebs un son Kroms."
Denn wollen de Beeden auk woll glieks den neichsten Dag ton Dokter. Sei erkunnigden sick bi Pannkokens Koarl, de wusse Bescheed. Do annen Berliner Platz sollen in Ossenbrügge eenige Dokters sien, hadde Koarl seggt.
Annerndags, Anna un Matzken hadden de Koh füddert, do maken sei sick fien un föörn metten Bus no Ossenbrügge. Un dat was nich weit vannen Bahnhoff, do wör soon Hochhuus un do wuornen ne Menge Dokters in. Dat was'n feint Huus metten niggen Upzug drin. De Upzug hadde ne Menge Klingelkneupe.
"Owwer", frogde Anna, "wecke Knopp is nu vo usen Dokter?"
Up eenen stönnt *Dr. Rechthaber*, dat isse amende. Inne dritten Etage stiegen de Beeden uut. Sei göngen bi Rechthaber inne Düerden, un denn innen Warteruum. Do wörn olle so fiene Lüüe innen Warteruum un Zeitungen un Illustrierte leigen uppen Disk. Sei sedden sick hen.
No twee Stunnen wörn de Beeden anne Riege.
"Der Nächste bitte", un den göng et innen Ruum van den Dokter, de stönnt achter son grauten Schriebdisk.
"Was kann ich für Sie tun?" frogde de Dokter.
"Use Mommen häw Piene inne linke Bost", antwohdede Matzken.
"Da sind Sie aber bei mir falsch", segg de Dokter, "da müssen Sie noch eine Etage höher fahren, ich bin ein Doktor für die Rechte."
Un denn wörn de Beeden auk oll baule wä buuten. Un wenn Anna un Matzken denn so innen Upzug no de veerten Etage wörn, segg Matzken: "Du, Anna, dat häwwe ick nich wußt, dat et in Ossenbrügge Dokters vo de linke un vo de rechte Bost giv."
|
