Et was inne Tiet van de Ährden. Kathrin un Frittken Möller wöern auk den ganzen Sauterdag üewer uppen Feild to arbeeden, ümme de Pettkuser inne Stiegen to kriegen. Nu hadden se sönndags inne Knuorken. Dat Loapen föll beeden schwoa. Oaber an düssen Sönndag höld Pastor Seeligmann siene Afdankende. De Pastor hadde sick in sien Kaspell Schliäsen nu oll baule twintig Joahr ümme siene Gemeende kümmert. Doa wollen Kathrin un Frittken auk bi de lessten Prierge doabi sien. Denn mössen se iärben dat Piärd vo de Kutskewagen spannen, de nu auk oll wä siet Wiehnachten nech bruket was un in Schoppen stönd.
Muorns nau de Immestiet föern Kathrin und Frittken denn lös, de Kiärken leig en Enne wäg van iährn Huowe. De Stroaten göng olle man lieke ut un et wöern iähr auk no keene Lüe inne Möte kuomen. Se bruken auk nichens ümmer nau votten to kieken. Met eenmoal, inne Heuchte van Buer Piepenbrinks Huowe, spröng dat Piärd bisite, een kortet gackern un eent van de Höhners was unner de Riär van Möllers Kutskewagen sprungen. Os sick denn rutstelle, was et een Hahn met sienen glönigen Kamm. Dat stolze Dierken richte sick nech mä up un was daute.
"Dunnerkiel", siähr Frittken, "dütt is mi jau Joahr un Dag nechens passiert." He flockde olle man vo sick hen. "Du moss di oaber iärben bi Piepenbrinks melden", mende Kathrin, et was ümmer fo Riärkenheet. Doato satt Piepenbrinks Oma faken an't Kamerfenster un keik niesgierig uppe Stroaten. Koarl Piepenbrink stönd oaber auk oll inne Niendürden.
Frittken hadde sick den Hahn anne Krallen grierpen un göng up Koarl Piepenbrink to. "Ick will mit di keene Praseligge häbben, Koarl, un doa mi dat nech voüerweln", siähr Frittken ganz sliepsstiärks. "Ick kann doa nicks an maken, de Hahn löep mi unner den Wagen, oaber dovo giebe ick di ganz wisse eenen niggen schönen Hahn", stüerde Frittken no.
De Buer Piepenbrink keik sick dat arme Dierrken an un siähr: "Et was mien schönsten und besten Hahn, he häw mi eenige Priäm inbrocht."
"Nu jau", folgerde Piepenbrink denn, "versoeken küern wi dat met eenen niggen Hahn, oaber ow de Höhner sick doarmet tofriär giewet?"
|
