Frittken Müffkenbrink hadde in Westkilver sien to Hus un hadde nonich vierl vanne Welt seihn. Nu hadde hä in *Meller Kreisblatt* liäsen, dat innen Ossenbrügger Stadttheater dat Stücke *Dä Zigeunerbaron* gieben wörde. He woll sick denn auk moal wat günnen un sick dat Stücke anseihn. Frittken hadde oll faken wat me dä Zigeuners do don hat. Wierkenlang hadde hä sick doarup fröbbet. Nu keimp dä Sauterdag.
Frittken göng annen Fahrkodenschalter in Leuhne un föddert: "Eene Fahrkoden na Ossenbrügge un trügge twedder Klasse."
Hä stönd no ne Wiele uppen Boahnstieg. Os de Zug nu inlöpp, do stönd een Kopee vanne ersten Klasse vo em.
Oh segg hä sick, kiek do auk moal bi de fienen Lüe in un steig in't Kopee vanne erste Klasse.
Os hä instig, do sittet twee fiene Härns in't Kopee. Dä wöern so voniährm, dä hadden in Frühling no widde Hansken an. Dä eene stönd denn auk glieks up un stelle sick vo met *von Baumberg*. Dä anner Pinkel teug denn auk glieks met un segg forts *von Waldstein*. Do liär Frittken sick obber in Positüer, welter sienen Prömmken ümme un gaff to vostoahn *van Westkilver*.
Unterwechens kiekt sä olle düer dä Finster un niähmt woahr, wat buden so vo sick geiht. Up eenmoal kümpf so deeip een Fleeiger düer de Luft gruisen.
Do liährnt sick dä eene *von* innen Polster trügge un segg so: "Es dauert nicht mehr lange, dann fliegen wir alle!"
"Wat denn", frogde Frittken nu niggelick, "hä Gi denn auk blaut twedder Klasse lößt?"
|
