Et was Kirmes in Niegenkiärken. Denn was immer wat löss in düssen Kiärkspell. Auk en grauten Tropp Minsken uut de Ümmegiägend, Buurn un Knechte, keimen in't Duorp. Vandage, et was uppen haugen Fierdag, wull auk Stienmeggers Anna met iähren lüttken Enkel Mathias een biertken uppe Festdagswisk.
Uörnerns göngen sei löss. Ünnerwiäges dröpen sei auk forts Stina Kleensmed. Stina was ümmer no erstet Maged bi Pleisters uppen grötesten Buurnhoff in Niegenkiärken. Dat Aulske dei ümmer so bekändelk, et was oaber auk 'ne aule Gaffeltangen un wüsse ümmer üöwer olle dat Niegeste in Duorpe to vertellen. Man keimp do faken nich van löss.
Vandage was et nich so leige, de Lüttke dränge de Beeden auk baule uuten anner. Oma was lange nich mä uppen Kirmes wiärn un wünner sick, dat de Lüe sick olle so fien maket hadden os keimen sei güßt uute Kiärken. Dat was fröher olle anners, vandage was nich eene met Hollsken anne Fööte mä. Oma wünner sick oaber auk, wat dat vandage bi de Kirmeslüe olle von'n niemodsken Kraums an Karussells un so gaf.
De jungen Mannslüe vergnögen sick bi *Hau den Lukas*. Doabi langen sei kräftig to um to bewiesen wo stark sei wöern. Keen Wünner nich, wöern doch nüdelk Wichters inne Neigde. De olltiet wiese Hiärm Kröger, Nauber van Sienmeggers, stönd anne Scheetbuden. He was doch fröher eenen strammen Soldauten wiärn, so vertelle he ümmer anne Theke innen Duorpkrog nau sienen vehrden orre füften Snaps. Nu jau, he hadde auk düttmoal oll eenige Blömkes vo siene Maria schuarten.
Omas Kniepken was nu auk oll lichter woarn, denn Mathias was so baule nich uuten Karussell to kriegen. Mathias höelt doabi de Lutskstangen fast in siene lüttke Fuust. He satt risk up dat witte Holtpiärd. Oma stönd in düsse Tiet anne Bieskenbude un söek nau eenen Liäbkokenhatte vo iähren Lüttken.
"Kiek es", siähr Oma denn, "dat passet oaber goot". Up dat Hatte was *Omas Liebling* schriewen. Eegentlick was dat Bändken do anne to lang vo den Lüttken, dat Hatte höng em baule uppe Knee.
De Tiet vogöng.
"Nü müer wi denn glieks nau Hus hen", siähr Oma, "süß maket sick Use in Huse amende woll Suorgen ümme us." Mathias mösse oaber iäben gawwe lüttk uute Bücksen. "Gong doa man inne Blüsen", siähr Oma, un haul dien Hatte bisite."
Os de Lüttke trüggekeimp, was he olle man an grienen. "Oma, mien Liäbkokenhatte is bannig natt woarn", röp Mathias sliepsstiärtsk. Oma tröstede iähren Enkel oaber butz un siähr met schmüsterlachen: "Och Jüngesken, dat is doch half so slimm, ick koope vo di een nigget Hatte, un dütt bringe wi vo Opa met, de stippet sowieso in." - |
