|
Ie ne me confesseray point. D'auoir aimé legierement, Car i'ay gardé de point en point La loy d'aimer loyalement: Aimé vous ai si fermement, Qu'onques mon cœur rien n'y pensa, Qui vous peult donner du tourment, Iamais il ne vous offensa. Pour recompense de l'amour Las vn autre en voy resiouyr Receuant plaisir nuict & iour, Duquel deuroye seule iouyr: Au moins si ie pouuoye fouyr Ce qui me cause pis que mort, Contrainte ne seroye d'ouyr Ce qui me tourmente si fort. Amour me donne affection, Obeissance & fermeté, A vn autre l'affection, Peu d'amitié legiereté: Amour auez vous arresté Qu'elle iouysse heureusement Du bien que seule ay merité, Pour aimer si parfaictement. |
Or aymeray-ie sans party L'amant sur tous aimants legier, Encores qu'un cœur miparty Soit bien pour me faire enrager: A luy seul me voulu renger, A luy tout seul ie seruiray, Sans me vouloir du tort venger, Mail mon mal en gré ie prendray. Et si mort venoit secourir Ce mien esprit tant tourmenté, Par vn agreable mourir, Loyer de sa grand fermeté: Que le corps donc en soit bouté, Estant party de luy l'esprit, Dans vn tombeau bien acoustré, Et par dessus sera escrit. Prenez pitié, arrestez vous, Icy gist le corps & le cœur, Dont amour, le maistre de tous, En fut autrefois le vainceur: Mais luy vsant trop de rigeur, La feit, sans estre aimé, aimer Vn variable & vn moqueur. Mais mort mist fin à mal amer. |
Close