|
O combien est heureuse La peine de celer Vne flamme amoureuse, Qui deux cœurs fait brusler, Quand chacun d'eux s'attend D'estre bientost content. Làs on veult que ie taise Mon apparent desir, En saignant qu'il me plaise Nouuel amy choisir: Mais telle fiction Veult mesme affection. Vostre amour froide & lente Vous rend ainsi discret: La mienne violente N'entend pas ce secret: Amour nulle saison N'est amy de raison. Si mon feu sans fumée Est euident & chauld, Estant de vous aimée, Du reste ne m'enchaut: Soit mon mal veu de tous, Et seul senty de vous. |
Si femme en ma presence Autre vous entretient, Amour veult que ie pense, Que cela m'appartient: Car luy & longue foi Vous doiuent tout à moi. Que me sert que ie soye Auec Princes, ou Roy, Et qu'ailleurs ie vous voye Sans approcher de moy ? La peur du changement Me cause grand tourment. Quand par bonne fortune Serez mien à tout poinct, Lors parlez à chacune, Ie ne m'en plandrai point: Bien vous pry ce pendant N'estre ailleurs pretendant. |
Helas qu'il fust possible Que puisses estre moy, Pour voir s'il m'est penible Le mal que i'ay pour toy: Tu prendrois grand pitié De ma ferme amytié. Vous seble-il, que la veue Soit assez entre amis, Ne me voyant pourueue De ce qu'on m'ha promis ? C'est trop peu que des yeux, Amour veult auoir mieux. De vous seul ie confesse Que mon cœur est transsi: Si i'estoye grand' princesse, Ie diroye tout ainsi: Si le vostre ainsi fait, Monstrez le par effect. |
Close