|
Pour m'eslongner & changer de contrée, Autre amytié dens mon cœur n'est entrée. La vostre y fut vn coup si bien receue, Qu'elle n'en peult que par mort faire yssue. Et ne croi point qu'auec vous elle meure, Si rien de nous apres nous fait demeure. Fortune me peult donner paix & guerre, Me mettre au ciel, ou au bas de la terre: Amour me nuyre en estre fauorable: Mais rien ne peult me rendre variable. Vn rocher suis de foy & de constance, Qui fai aux vents & ondes resistance: Qui pour temps calme ou tourmente que face, Iamais ne bransle, ne change de place. Burin de plomb pourra grauer figure Sur diament, ou autre pierre dure: Et des riusseaux les eternelles courses Retourneront contremont en leurs sourses, |
Quand on verra en mon cœur breche aucune, Par nouueau trait d'amour & de fortune. De moy vous feis seulle maistresse & guide, Pouuoir plus grand, peult estre, que lon ne cuide. De cet' estat plus seure pouuez estre, Que n'est du sien nul prince ny grand maistre. Rampart n'y faut ne mur qui le soustienne, Pour crainte qu'autre oster ne le vous vienne. Assez est fort, sans qu'y mette personne, Pour resister, si assuat on y donne. Car si richesse y vient, elle est trop ville, Pour vaincre vn cœur gentil, & non seruille: Et n'est hauteur de couronne ou d'empire, Ny les faueurs ou tout le monde aspire, Ny grand beauté qui les cœurs legers tente, Qui plus que vous me plaise & me contente. |
Close