|
Pvis que viure en seruitute Ie deuoye triste & dolent, Bien heureux ie me repute D'estre en lieu si excellent: Mon mal est bien violent, Mais amour l'ordonne ainsi, Vueillez en auoir merci. Vostre beauté sans pareille Ne doit prendre à deplaisir, S'a l'aimer ie m'appareille, Car on ne peult mieux choisir: Si i'ay par trop de desir, I'ay beaucoup de foy aussi, Vueillez en auoir merci. Autre bien ne veux pretendre Pour mes plaintes & clameurs, Sinon que vueillez entendre Que c'est pour vous que ie meurs: En mes yeux n'ha plus de pleurs, Et mon cœur est ia transsi, Vueillez en auoir merci. |
Vous seulle estes ma fortune, Qui va mon bien mesurant, Si vous m'estes opportune, Peu me chaut du demourant: Sans vous ie vi en mourant, Et m'est le iour obscurci, Vueillez en auoir merci. Si lon portoit la pensée Au front, comme on fait les yeux, M'amour seroit dispensée De son office ennuyeux: Par vous mesmes congnoistriez mieux Mon trauail & mon souci, Vueillez en auoir merci. |
Au cœur des bestes sauuages Rigueur loge proprement: Mais sur les humains ouurages Amour ha commandement: Et toutesfois en tourment Me tient le vostre endurci, Vueillez en auoir merci. Ce vous est peu de conqueste D'aller ma fin poursuyuant, Bien vous seroit plus honneste Sauuer le vostre seruant: Vn qui pourroit en viuant Vostre nom rendre esclarci, Vueillez en auoir merci. |
Close