|
O la mal assignée L'heure de mon desir, Et moi trop obstinée Contre la destinée Pour faire à ton plaisir. O moi trop amoureuse Te voulant secourir, Las i'estoye trop heureuse, Sans la main malheureuse, Que lors te feit mourir. Mon tourment & ma peine Amants venez ouyr Ialousie inhumaine, Quand i'euz ma vie certaine, M'empescha de iouyr. Ie m'estoye preparée A l'assignation Que ie t'auoye baillée: Las trop mal conseillée Ie fu d'affection. Ie me pensoye saisie Du fruicts tant attendu: Mais faulse ialousie M'en ha bien desaisie, Et me l'ha cher vendu. |
L'un estoit pour attendre Le fruict de l'amour fort, L'autre pour entreprendre De tous deux nous surprendre, Et de te mettre à mort. Mort as tu peu defaire, Las si cruellement, Ce qu'amour vouloit faire, Pour fournir & parfaire Nostre contentement. Or l'has tu acheuée Meschante cruauté, Las tu m'has bien priuée De l'amytié priuée Par ta desloyauté. Pourtant la iouyssance Meschant de moy n'auras, Et pour toute esperance De ton outrecuydance, Morte tu me verras. |
Celuy qui la merite, Maugré toy iouyra: Mon ame trop depite La sienne palle & triste De iouyr poursuyra. Amy que ie t'embrasse, Que ie baise tes yeux: Helas ou est ta grace ? O malheureuse place, I'attendoye beaucour mieux. Bouche qui par bien dire Vainquis ma liberté, Et qui la peus destruire Luy contant son martyre, Ton feu est arresté. Bouche que ie te baise Cent fois te baiserai: Ce baiser ne m'appaise, I'attendoye plus grand aise Que iamais ie n'aurai. |
O main la plus vaillante, Qui les armes porta, Ta beauté excellente Et force violente, Par trop me transporta. Puis que mon ame est morte, Le corps s'en sentira: I'ay la main assez forte, Ton ame que ie porte, Apres toy s'en yra. Amy dont fu seruie En parfaite amytié, Irai maugré enuie, Pendant ma triste vie, Te rendre ta moitié. Dans les champs Elisées Apres toi m'en yrai, Ou de pleurs arrousées On verra mes brisées, Et par tout te suyurai. &c. |
Close